Rumah Aman Gampo

Palanta

Kudun bamanuang-manuang surang di suduik palanta lapau Uwo Pulin. Pandangannyo jauah manarawang ka langik nan nampak agak kabua. Bantuaknyo ka turun pulo hujan.

Nan tapikia dek Kudun, lah anam bulan sasudah gampo, tapi rumahnyo nan rusak barek alun juo dipaelok-i. Samantaro hari-harinyo abih se untuak bakarajo di rumah urang nan juo samo-samo korban gampo.

Barangkali wajar-wajar se Kudun tamanuang, karano bantuan alun juo turun dari pamarentah. Harago bahan-bahan bangunan kini sabana maha. Mulai dari basi, paku, simin, kasiak, batu, kareke, bata, kayu sampai slang aie lah naiak sadonyo. Kalau indak juo dipaelok-an, takuik rumah tu runtuah bana Karano, kini lah acok pulo gampo liak. Gampo tu datang indak sadang siang hari se doh, tapi labiah acok pulo malam sampai manjalang pagi.

"Baa lah aka rumah awak-awak nan korban gampo ko lai Ngah? Bilo juo bantuan ka turun? Kok rumah urang iyo lah awak karajoan, nan rumah awak baa?" Sorak Kudun.

"Dima-dima, rumah urang tukang jarang nan salasai Dun!" Basorak pulo Tacin Barain.

"Tapi sakali ko, kalau awak mambangun rumah untuak anak-bini awak musti salasai. Salain itu, nan paliang paralu, rumah harus aman gampo," kata Angah Piyan.

"Mukasuiknyo rumah awak indak rusak dek gampo?" Tanyo Kudun.

Maka bacaritolah Angah Piyan, baraso rumah aman gampo, bukanlah rumah nan tahan dair gampo atau indah rusak dek gampo. Kalau tibo gampo, kemungkinan rusak ado juo, namun masih aman untuak urang-urang nan mauninyo. Bangunan aman gampo dibuek sasuai jo standar minimal nan lah ditantukan dek ahlinyo. Kalau tajadi gampo ketek, bangunan indak ka rusak gai doh. Kalau datang gampo agak gadang, bangunan bisa rusak, tapi hanyo komponen non-strukturnyo se, sarupo dindiang ratak nan komponen strukturnyo masih aman. Saumpamo tibo gampo sabana gadang, bangunan bisa se rusak non-struktur jo strukturnyo, tapi indak runtuah. karano itu, tonggaknya musti labiah kuek dari slof. Basi-basi nan dipagunokan musti tasambuang arek sasuai aturannyo sadonyo. Indak buliah ujuang basi indak dibengkok-an supayo kalau datang gampo, basi-basi tu basipacik.

"Kok rumah lai indak batingkek baa Ngah?" Tanyo Tacin Barain.

"Dalam aturan nan den baco, untuak rumah tembok sederhana indak batingkek, harus mamakai ukuran tonggak 12x12 cm, slof 12x20 cm, ukuranb asi memanjang minimal 4 buah badiameter 10 mm, sarato basi begol badiameter 8 mm. Jarak cincinnyo mustilah 15 cm," jawek Angah.

"Pondasinyo baa Ngah?" Tanyo Mak Pono
"Nah, pondasi harus disasuaikan jo kondisi tanah. Samakin lunah tanahnyo, samakin dalam pulo pondasinyo. Tapi, rato-rato untuak rumah sederhana sarupo rumah awak-awak ko, kedalaman pondasi batu kali saktiar 80 cm," jawek Angah.

"Kalau batingkek rumahnyo baa?" Tanyo Tacin.

"Kalau itu, ukuran bangunannyo musti dietong dulu dek ahli struktur, supayo indak salah," kato Angah.

"Takana dek den, rumah-rumah nan wak karajoan tu kan lai memakai teori itu sadonyo ndak Ngah?" Tanyo Udin Kuriak.

"Ma nan lai mandanga urang punyo rumah jo saran awak, indak ado masalah doh. Saluruhnyo lah sasuai jo standar rumah aman gampo," jawek Angah.

"Tapi mambuek rumah bantuak itu kan banyak modalnyo Ngah," kato Tan Baro.

"Bialah rugi mambali, asa lai manang mamakai. Banyak bana modal untuak mambali bahan bangunan, tapi awak nan mauni manjadi aman. Ado juo ciek lai mah, kualitas bahan-bahan nan dipakai musti tajamin pulo. Umpamonyo bata ijan sumbarang se, harus bata nan kareh. Kok masih patah dilangkangan ka kaniang, itu tando bata laun rancak. Baito juo basi harus nan punyo lambang SNI. Aduak simin indak buliah sumbarang se doh. Aduak untuak beton nan rancak tu pabandiangannyo 1 simin, 2 kasiak 3 kareke. Aianyo jan sumbarang se lo. Usaokan aia barasiah. Samakin banyak aianyo, mutu beton indak rancak deknyo doh," kato Angah manjalehan.

Kawan-kawan Angah nampak maangguak-angguak. Barangkali kasadonyo bisa mangarati, karano rato-rato nan ado di lapau tu adolah pakarajo bangunan dan Angah marupokan komandannyo. (Espe St. Soeleman)
Comments